მარგალი მუშენი თაკილენს მარგალურო ჩიებას
ოცადდეს დო ვაჸვილეს
კვარტი დო ქურსიში რქიებათ...
მარგალი მუშენი თაკილენს
მარგალურო ჩიებას?
ჩქიჩქუ, ახალი დო ხანიშუმილქ
კოლხური ხმაშა იბირით,
სამარგალოს მარგალური
მიმარგნა კიბირით.
თე ცაში მინჯეთ დიდი ღორონთქ
მარგალიში მეტი მი ბპუას,
ქუდი შხვაში დუდიშა გეფორილი
სკანი ჸვას ვაგოიტიბუანს.
ბჟა, თუთა დო მურიცხეფი,
ბინეხი გოშილი ბულიში ჯას,
თეზმა გვალა დო წყარეფს
შხვა მიქ ოკო უმინჯას.
კოლხი კოჩ, ჯიმა, დღა მუშის
ვაუჩექმუ მუშ რჯულას,
ნანაში ნინაში ჩონგურით
არკვანს მნნაღურჭულას
ქუგუდირთათ მანგარას,
ნტერიში ჯინშენი ვერუათ,
სამარგალოს მარგალურს
ირკოჩქ ქუმუფერუათ!
ქალამსიმეთ ოსხაპური,
ჩილამურით დიბშირით,
ზიტყვეფი, ნამუთ მუმალეფს
მუკნატებუ აფუ ზისხირით,
ღურელს ხოლო ქომბირენი
ძვალი დო ჯერღვის აკილენს,
მარგალურო ჩიებას
მარგალი მუშენი თაკილენს?
ხობწყარს კიდირი დოშინაფუ
ხობწყარს კიდირი დოშინაფუ,
გიანტირენი მერეხანს,
ცა გვალეფეში პუხა ხუს
ჸინით გაგმაჩერეხანს.
დაფის ხუტოლაფირი წყი,
ტკიბირიცალო კანკალანს,
ბჟა ხუ დო გვერდი მურიცხის
გურიშა მნმიკაკალანს.
ზესქვი ტყარ ხვიმას მიკიცვანგ,
ზოთონჯს მუ უჯგუ გემუანს,
დამონჭვებული ხულიში ჯინს
ტორონჯი გინმიჭვემუანს.
სოფელი ონტკას მეუჯან,
ხუთოშიანს ოლუანს,
თოფურს მონატრებული თუნთი
ბირცხეფს უწირწოლუანს.
განთხი დო კილეს ვუმარდქ,
ვავონდურუქ ასაკის,
შურო ქმკმარჩქილეთდა
გეჩიებუთ ფარსაკის...
მოგოთანეს მაჸალეფი
ნადირუას ბნირზენდით,
ერცქემს ტრყვია ქეკვოგრეში,
ნაკიდირა იმენდით.
კიდირიში ძვალი გოწკირუდუ,
ჭყოლირი გურიში რაბადით,
კარეში ყებურს ელვოხეთ,
მწვადიში წკირი დო ნაბადით.
მენძელი ნანატრი კოჩი მიჸუნს,
ბოლო ლუკას ვაჩუანს,
ბჟა მანტუნი ფერი ელარჯის
ჸვალით ეთმუფაჩუანს.
თოფი კვათარას ყარულენს,
ცხენი იდიარს შარაპიჯს,
ჯოღორი ხოლო ნდომულენს
გოთანაშა შარაფის.
კილეს ფართას გობშალნთ,
ყანწეფს ქიმიბრქინუანთ,
ცოცხალს ქუადღეგრძელენთ,
ულირს ქიმიბშინუანთ.
ხობწყარს კიდირი დოშინაფუ,
გიანტირენი მერეხანს,
ცა გვალეფეში პუხა ხუს
ჸინით გაგმაჩერეხანს.
ღორონც მარდის ქიმუჩინა
სანთელს ჩქიმი ხეთ გეგლაბქიმინ,
ხატეფს ხატის ქიმუძინა,
განთხი დო კილეში სინთელეშენი,
ღორონც მარდის ქიმუჩინა.
ყამა ქიგლმობუ, ჯოღორი ქოპუნს,
ქირს ლაკვატას ქურქინუანქ,
ცხენი ეფერი რე, ნტერი დობლანდენი
ჭიშკარს გეგნუოჟურგინუა.
ჯარგვალს თხომუში ტაბაკი ქმლადგ,
გიდელი დობღობი სამორჩილო,
ღობერს ჭურა მიხირხოლნი,
თინა ქოღირ დამორჩილო.
ხოჯი დო ურემს მუშა ბკითხენქ,
იაქე რე, ჯიმა, გვალო,
ჯა დო ქუას ვამკმუდირკუ,
ნიკოლოზიში მერანცალო.
ოჭნახ ირო სუმარს უჭანს,
ოჸვილურეფი მორღოთ პუნა,
ოსური ხასლას ქომტიბუანს,
ვეგმოჭვენს დო ვეგმოთნა.
ტარი ტარს მნოძ ლაიტი
ჸვანას,არკვანს ქაშეხვარხვალ მოთა,
ანწი მემოჩქნი ართ ოში წანას
დუშაშიცალო ქუოჸოთა.
ართი რე ცხრა წყარო დო ჩხოროწყუ
კოლხური დემი კოჩანაში ართი ბჟას
მუკმუკი ვითოჟირი მურიცხი გოროწკუ,
სი ნამუ გახიოლენი გიოდვი,
ართი რე ცხრაწყარო დო ჩხოროწყუ.
ჩხორო წყურგილე ვარ, ინჭაში
კვირკვეს მაძირაფუთ ბრელი მურს,
ღორონთიში ნაქარგა ჩქინი ცას
იმენდი ბჟაშე ადრე ელმურს.
სისმარს ხექ გომიზგირტ დო თიმ სერს
ბალიში ჩილამურით დობწარი,
ტკილეფს, სუმი, სუმი ხმასა მიბირს
სქურჩა, ოჩხომური დო ხობწყარი.
შურო გეგნოთუდა უკული
გვალეფს უსკვამაშის სო ძირ,
ტობაში ტომბა გურიში ხვართქალი
კურცხე თოლით ხოლო მოძირ.
შურიშა კარაკანო ალმონჭ
წუწელი მენჯიში წყარიში კარკალი,
შურუბუმუში მობარხატელი ბაღჩას
გოქუნს ანთასობით ზაკალი.
ცაში ცხვენს არწივი ამერსიოლ,
ერცქემი მიკიდიარს კირდეს
მუხურს წყარი დიხა დო ჰაერი
ლაშაში ლერსიში გემოს გიტენს.
კოლხური დემი ჸოროფაში ართი ბჟას
მუკმუკი ვითოჟირი ჸა გოჩანს,
სო ხე თეცალი რჯულიში სკალეფი
თეზმა ჭუბური ართო სო ჩანს.
თუთას ცაშიკიბულშე ქელანჭი,
სანთელი ოსინდალეს დოწირი,
დამიჯერი ღურა დღაშა ჯიმა
ჩხოროწყუ ართიშა იშენი ქოძირი!
ქორთუო ერჩქინა
ცაშა ათუბიჯჸა გვალეფს,
ვაკო თეს ფიქრი დო ბრელი რჩქინა,
შხვა მუდგასრენი ავალენს
ქორთუ კოც ქორთუო ერჩქინა.
შორს ჩხორო სკუაში დიდალეფი
შულადირი ხმაშა რკიანა,
შურიმალაფუ რე დო გამკატეთ
ღორონთიში დიდაში ქიანა.
დოხვამე, ბოდიში ქუდუჩინი
მიდგა გიუნდას მოხოლე,
ქიანა ოკო გემირდანი
ირ კოც ჩქინი დუდიში წოხოლე.
თოლიში ონჭაფუს ვარჩქინდუ,
დიხას მიჩირჩოლ, გვერულო...
სუმარს გურიში კარი გუნჯათ დო
ნტერს ქდობხვადათ ნტერულო.
შოთა გოხოლთ, მანტებელი
ჩხე ხიშტის ჟიდო ქაღურუ,
ლომეფშა მარკინებელი დო
ერჩქინაში დღაშე მაღურუ.
ამდღარშა ბრელი სერი მიტახნა,
დო ოტახალით ბრელიე,
ქორთუ ბოშეფი, ნგერიში ბირგულამი,
არწივო ერჩქინელიე.
ჭვენს, სონიხანიე ვაგუღალ
ჩხე ჩილამური მაბუ ცას კინე,
მუში ქინაშო ჸვილირშა
ღურელი დღას ვადიძახინე.
ოდო მარულენი, იბრულექ,
განთხი მებტახეს და ბქულუა,
ჩქიმი ჯიმა ხამუს ქირქენსდა
მა მუჭო გთიბრულუა...
უდა უჸვაიჭარეეფს
ხასლას ლანდიცალო მოპუნა,
ჯვეშეფს მუ, ოხიოლდესო
თეზმა ზისხირიში დობუნა...
ამდღა დო ამსერი ჭვარნდეს,
ნანგერეთ მუთა ფალერე,
ქართი ართი დღას ვაშენებე დო
ვართი ყილოშიტყებამი ჭარელე.
მათ რული გოტახილი სანთელით,
მებგორნქ ეფერი მარენჯი დღას,
მთელი საქორთუო, ოსკუნი თეში
ართი დროშაში თუდო ხარენდას.
შური წყანწყილს, ხიოლი ვემეპუნს
ირი ახალი თუთაში მორთაშა,
დობღურენი ხოლო ვემემდვათ
ბალიში სოხუმიში დორთაშა.
ვარ, გოლვაფირო, დამიჯერით,
ვასაჭირ ფირქი დო ბრელი რჩქინა,
შხვა მუდგასრენი ავალენს
ქორთუ კოც ქორთუო ერჩქინა!
ფიფრქენქ ქგამგენს ჟინიერი
ფიფრქენქ ქგამგენს ჟინიერი,
ოჭვებურს ვახვარ ფულუა,
სკუას აფხაზეთი ჩქინიენი
არკვანიშე დუოგურუა.
ბოლოშა გამონწყი დუდი გუდას,
შურო გეუნწყნქ ამბესნი,
ბაბუემქ ზისხირი უჩქდას
მუჟამს სო მუშენი დაბესნი.
სუმარს დობხვადუქ ხერძელას,
ორტვინსთ მა ბრგნქ პამინდორს,
შხვაქ მუშენი მიწიმენძელას,
გურიში გოლვაფირი, სკანი მინდორს.
ფუბჩაფულენქ დიდი რენი თიში სახელს,
ჩხუპი რე და ჩხუპიქ იჸუას,
ვაგოტენთ ძალო მიდნაღელს,
ნაჩუქერი შერგე გიჸუას.
უკლაში ბოში შურიში ოსხუნური
მალას ჸუს ვათხინს არიკეფს,
ოშკარი ცხენს რულათ შულიდნს,
უნჩაში მერეთო ფარიკენს.
დიო მათ ქიბრგქ მორკინეთ,
ბაბუ უკახალე ვეკინანს,
ქორთუ ერი დღას ვადვაჩოქინეთ,
ნტერს ოხვილნი ფერი ლექინას.
ჩქით მუთ დუდი ქობშნანი, ირიათო
გომირენა მუჭოთ კიდალეფი,
ოსური დო ცირა-ჯიმა დო
ჩქინი ჩილამურამი დიდალეფი.
და თუ გვიჩნს გენი იბერთა
სულით უტეხი კაჟია,
ართიშა ქორთუო ერჩქინელს
ღურუ ვადასკვანს მაჟია.
მატყობინჯე დო მანტებენქ
უჯგუ დუდიშა მუში ხეთ მინტუას,
თოლი გინჯანდასნი, ფასი ვაუღუ
ხვალე რგილი ღუმუში ყინტუას.
ამდღარშა ვეშალ კოლხიში გენქ,
ხვალაც გავუძლებთ ტკივილებს,
კინე ჩქინი დიხაში მოცილეფქ
მუდა კოჩიში გერი მიჸვილეს.
მარა ერჩქინუში სიტომბაქ
ხოლო ვეშანწყინ კოც მურენი,
ბედი ოკო გიღუდას, გოლვაფირი,
სკანი ქიანაშო დოღურენი.
მემჩქნი გეკიბირს ანწი მალას
შურო ტიბუ გურიში მითიენი,
ქორთუ კოჩი სოხუმიში უმოშოთ
სუალეფი ტახილი ჩიტიენი
დო მაჭირხოლიში დარსხებუშა
კაბამი ხოლო ურს გაჭირდდა,
შურქ წკონდას ოკო ეშმოლანი,
ქიანას ქდესაჭირდა.
ფიფრქენქ ქგამგენს ჟინიერი,
ოჭვებურს ვახვარ ფულუა,
სკუას აფხაზეთი ჩქინიენი,
არკვანშე დუოგურუა.
თე თუთა
ვოკვირქნი თე თუთა
ცას თინერო ულუანს,
ზოთონჯქ მალას ვეთუდა
ღურუ გაგთომტყურუანს.
იმენდი გმოტყაბარელი
შურიმალაფუ კარს გივორექ,
ნაყოროფუში ჩილამური
ხშირას ქმნომქიორეთ...
სოდგა ბღურენი, ვართხულენთ
შურიში ძაფით ჸონაფას,
აქ ცოცხალო ნაწამებუ
ექ ვეველქ ჩხონაფას.
ჭკუდიშა ვენომჸუნუათ
ვართი ჟურნალი დო ვართ გაზეთი...
ხვალე ლერსის მეკირილი
დიხას ქიმთმოჩარგაზეთ.
ახალი კოსტუმი ვადასქვანს
ინორჩინელს ართი ჩაფლას,
ღვინი გალეშე ქმნაბით
ჩქიმი გვიმარამი სასაფლას.
სანთელს იშენი ონტუდას,
ეკლესიას ჭუნანი ფერს,
ხერძელი პირჯვარს გეგნიწერს,
შუმილს შარას გუნათენს.
სახელი დო გვარი წარკანტით
გეშაღანძგით ჩე ქუას,
ყამბარი ვამნომფორუათ,
თირი დო ჭვიმაქ ბჩექმუას.
გური იშენით ვაპირენდ
ბრელი მუთუნიში დოჩინას,
ოშიშე ართიშა გვალაში წვანს
ვალი დო გურგინი ქობშინანს.
ვოკვირქნი, თე თუთა
ცას თინერო ულუანს,
ზოთონჯქ მალას ვეთუდა,
ღურუ გაგთომტყურუანს.
