მეგრული მინიმა...
ბჟაშ ელნაფალა რენია,
მარა სო რგორიკო, ვაუთქუალნა.
...
სკან ენნაჯინა თუთაქ გომსინთუ.
გვალო უკმელათ ეფშა ვავოფექ.
...
მურიცხეფს მუ უჩქუ,
გურ მუჭო მავარვალუ.
...
ბაღანეფიშ მენდულს გორჭყოლად,
ნამ მიშაკინელს გიჯინედინ...
...
ნამ ბორიაქ დოირქუ,
ცაშა ქინწყვე დუდინ?!
...
ჯოღორეფიშ ლალუას გევაუნ,
თუალა ქუდუჭყაფ.
...
გეშკირატილ ჸუდეს
ჯაქ ხოლო მიოტუ ფალუა.
...
ჯუნა მოკოდ,
მარა ლერსის ჭარუა იბსხუნე
ეგებ ქუგაჯუნკო..
...
სკან უკულ ვაბსერექ,
ბჟაცალო რექ ეფალირ
ჩქიმ აკაბურცხა გურს.
...
ცას მიკოწირადილ მურიცხი,
მოგოთანეს ივარვალუდ
ღორონთიშ თოლცალო.
...
გათებე,
მარა იშენ უსოფუანდეს
შურ ეშალაფირს.
...
ვათქუა მუთუნ,
ენოჯინაშენ მიბაღ
ამდღარ დღაშა მონტუქუნ.
...
იბცხვაბარუქ,
მარა ჩქიმ ოროშ იშო ვამალინ.
...
დიბლანდღვი,
ჸურუმ ქუა ხოლო ვეძირე
ჩქიმ ცა აკოცუმილ თოლებშე.
...
ქუგმოთანდ,
ართ ლერსიქ ხოლო ვამაჭარ სკანდე.
დომრულუაფუდკო, ეგებ სისმარს ქუმაჭარკო.
...
ითამ, ცას ამუორდ სკან მათხილეთ.
ითამ, ღვინს მინმობუნდ შურიშ ოჩხონაფალს.
ითამ, ბედნერ ვორდ ათიშ მიმაჯინუ.
...
სო იღ თე მურიცხეფ?
ღორონთიშ ოზეშა მუჭო მინოტყობ?
ირდიხას სი მუშენ აწმაძირექ?
...
შუმილ ვორექ,
ქექას უკინაქ პაპროზის,
აკაფცხა მორკ გიბძიცუენ.
...
იფრელს უღ ბოლო,
მარა მუთუნით ვამათებუ
სი რძირი, თიმ დღაქ.
ჸოროფა
ღურაშა მუთუნ ვემუძუდ
დო ღორონდიშ მანგიორო
სკან სახელს ირაუანდუ.
...
ლერსეფიშ მენდულქ
სანთელ ქიმუნათუ თუთას,
აკოცუმილ სიზმარეფქ სინთეს დინწყვეს.
...
მარჩქილე ვარდ.
ბორია ნოელებს ბორდიშანდ
ჩქიმ ორაგადეს.
...
იფრელ პოტიკ რენია დო,
გოზიორილ კიდალას
დიხა ქინკარღუ.
...
ცალუნც მუაჩქიმ ოდიარეს.
ოჭუმარეს ეთმოდირთუ დო ცალუნს,
ბაბუ ხოლო ცალუნდ...
რინა მუჭო გუ ართიანს.
...
მუსხიშა გებძირაფუქ,
ითამ ხოლოს რდი
დო გოკურცხია, ალმოფუცქინანდი.
...
შკა სერიშ იშო,
გოთანაშ იშო,
დღა ოდღეშ იშო,
ონჯუაშ იშო.
ხვალე მემიღ ოღალ
სკან ოროფათ ეფშა.
...
შარა ვარე,
უსკანეთ ვეგუაუნე შარასუ.
