. . .
მის უჩქჷ, მიშო ზოთონჯანს,
მიშო ზოჯუნს აფუნი,
მი სო გილეფაფუნი.
მი მის მურე აფუნი?!.
ღორონთი მიშჷ კარს ონჯანს,
მი მეტებულჲ აფუნი,
უღორონთეთ ხანდა მის
წყარშა ინორღვაფუნი;
მიქ მუ მიოფურთუნი,
მიშო მუსხი უთუნი,
მიქ მის სო ეურთუნი,
მითინს ვაუჩქუ მუთუნი.
მის გური მიშა ურთუნი,
თასილქჷ მის ეურთუნი,
კუმა რე დო თუთუმი, -
მითინს ვაუჩქუ მუთუნი.
გუმაჭყაფალს ხვალე უჩქუ
ირ კუმა დო თუთუმი,
იშ თოლიში ტყობაშე
ვექიმინე მუთუნი.
ნამ რე ათაქ გურ-მარგალი?!.
ნამ რე ათაქ გურ-მარგალი,
ჸუჯიში გილმაფაჩაფალი,
ზიტყვა მის უღუ ელჷ დო ვალი,
მუნაფაში მაფაჩალი,
ნამ რე ათაქ გურ-მარგალი?!.
ქომწით ასე მა მართალი,
მი რე ქუჯიში ნავითალი,
მი რე ცოტნეში ნავითალი,
მის უღუ ზიტყვა შხვაშჷ გართალი,
ნამ რე ათაქ გურ-მარგალი?!.
ობადდიხაშჷ მის არჩქილე,
ვართ მითინიშ ნაფაჩალი,
მის უფუნს შქაბან გურს
აიაშჲ ბჟაშჲ ნაბარჩხალჷ,
ნამ რე ათაქ გურ-მარგალი?!.
ჟირი ჰაიკუ
. . .
მუთ ვაგოხუჯუნ,
მაარიკაფალი რე,
ანწი დღას ვეჸი.
. . .
ღორონთი, მარდი!-
ბჟაშ ელულა ბოშეფი-
ხიოლიშ ჸუდე.
. . .
ინგირს მოუღჷ დორანწკილი
მის ბგუთჷ დო მუჭო ბგუთჷ,
წყარიშ თუდო მუთ რე ნწყვილი,
ეთიდინუ დიხაქ მუთჷ.
ვაგათქუე წყარშენ ჸურუ,
წყარ რე, ნინას ვაცადუ დო
დიხაქ მუთჷ ეთიდინუ,
მუთჷ რე ნწყვილი წყარიშ თუდო,
მოღვარანს. მუთ იხანგუ?
გინაფულე, მუდგა ურთე,
ეთიდინუ მუთჷ დიხაქ,
წყარიშ თუდო ნწყვილი მუთ რე;
მუჟამს გიჩქუ, მის ბგუთჷ,
ითამ ვარდას დინაფილი
ეთიდინუ დიხაქ მუთჷ,
წყარიშ თუდო მუთ რე ნწყვილი?!.
. . .
გოთანთალერი გოფშა თუთა,
სო იდი დო სო მედინი?..
ელატყობუქ ჩე მუნაფას,
სისანდი ვარე სოლეთინი.
შურს შურებშა გექთუტყობუ,
ჯას წკვერწკვენტის ულუანს,
ეცალი თუთარჩელა სერს
მუ ჭირი დუგორულუანს?!.
ვო მუნაფა, ჩე მუნაფა,
მიშჷ ულამუ თის ჸუნაფა?!.
. . .
ეთი შარას ტყობუ ღურუ,
იშა მუჭო ვამოშკურუ,
ვამოშკურდას ვაშინერს,
მარა ჩქიმდა ვაშქირენს.
ითამ შურო ვამჩინენს,
ვებჩინენქ ითამ შურო,
ვარც თაში დო ვარც თეში,
ვარც ჯგირო დო ვარც ფურო.
-ვო ღურუ, რსხება გოგონდას
ჯიმალობა გოკონდა,
სოდგა რენო რექია,
ქოტყობუდა თექია.
მუჟამს ჯგირო დიფშირუქუ,
ვეშმალებე ისხია,
დოიძახუქ დო ქომსაშველი,
თე რინაშე მირსხია.
ნარაგადა ქუგომშინი,
დოლასი, მუდგა ბრაქვალე,
შირილი ნოჭკუდიაცალო
იშო მიდმოქვაქვალე.
ეთი შარას ტყობუქ, ღურუ,
სქანდა მუჭო ვამოშკურუ,
ვამოშკურდას, ვაშინერს,
მარა ჩქიმდა ვარშქირენს.
გემანგარი, სამარგალო!..
გურს მონტუქუ, სამარგალო,
ვაგაფუქუ შხვაში თური,
ართო თოლიშ სინთე რექ,
შხვა მუ ბთქუა ოცქვაფური.
მთელი ქიანა მილე ხოლო,
თოლს მუს უკინდუა ეცალს,
ართო გურიში სიტიბა რექ,
ბჟა დო თუთაში მუკნაკვეცა.
ბორჯი ილენს მასქურშორო,
რშუ მუ იღუ დო მუ მიღუ,
ბაბუში ბაბუში ბაბუში იშო
მითაჟამიში ნინა გიღუ.
გიხვამანქ ჯინჯი დო ჸას,
ცაშა ფსუას გიხვამანქ,
სქანი ტანიში არძა ჭუა
გიმე–გიმე მიღვამანკ.
მუთ ჸოფენი, კინი იჸი,
აიაში ბჟაში ნატრი რექ გვალო,
ხურხიშა ოხუტოლაფარი,
გემანგარი, სამარგალო!..
. . .
კოჩანიერ ღურელს – მარდი,
ჩხორო მარდი – მაშინეს,
სანთელცალო მიდგა რდუნი,
ვაშინუე – ვაშინერს.
ჸურუს მითა შუდუ, მარა
გასაშინე გაშინეს,
კოჩანიერ ღურელს მარდი,
ჩხორო მარდი – მაშინეს.
მუშა გოშქურ…
მუშა გოშქურუ, ბაბაჩია,
სქანი ბჟა დო ორთაში დორთა
ამარ გერე, გიძიცანს –
თოლეფწკონდა სქანი მოთა.
მუშა გოშქურუ, ბაბაჩია,
ახალი ეურს ნაცალას,
ჩხანას გიმე გიმულებუ,
ამარ ეთგობარჩხალანს.
ა სქანი ჩხანა – სქანი ჭყანა.
. . .
კოჩი მუ ჸოფე! მუდგა თის
მუშ–მუში თია დურიგე,
მირულე დო
მეზგირტუ დო
მიხვარხვალუ ურიგეთ.
ნოტე თევრე მუ ამბე რე,
თევრე მუ რე, შურიგე?..
. . .
სამართალი ვეშაპუნა,
თოლი განჯი, უნჩაში, თოლი ვაწკურა,
მუთ მიწითჷნ, არძო ქულა,
კაბინეტიში ნასასურა.
გვალო ეცალ კაჭა ზიტყვა
შუროთ ვარე ცაშა მალუ,
დიპანჯუ დო დიტატარუ,
დიპანჯუ დო დიტატარუ.
ცოდა ფუნს დო იგვარგვალუ!..
ვართ ჯოღორიში,
კოჩიში სქუაში
გეგონი, უნჩაში, მინაჸურა:
ქო, სქან ჭირი, ახავაი,
ქოთ მართალი ე სქან ტყურა!..
…
რინა ქოისხუნჷ ულაშა,
ღურუშ მოტყობუაშა,
ექ მუ გელუნჷ, ვაიჩქუ დო
ვაღურედა ღურაშა.
ჩქინ კარტის უჩქინეთჷ
სოდგარენი ფაჩუნა,
ათე ორთაშ იქილე
სო მეურთუნ, ვამჩქუნა.
სისმარს მუთ უჯგუ ე რინა,
ხეს გეიშქვა ნირზიშა,
მიფქვაქვალუთჷ სოდგარენი
ნირსჷშე – უმოსი ნირსიშა.
. . .
როგუნჯი მურსჷ დო მომერეხანსჷ,
სი მუ გოკო თის მოთხუე,
მარა თიცალსჷ იბირბინწუ,
ჭვიტის ვერზენს, ვა ქოთქუე:
ვო როგუნჯი, სი როგუნჯი,
სქანჷ ბირბინწი მის ოხუჯუ?!.
ფარსაკი რე ე ქიანა,
ქიგთმოხუნეს წკურუმიას,
დუდო ღორონთი, მუშ–მუში ირკოც!
თოლი გაფუნო წკურილია?..
ვო როგუნჯი, სი როგუნჯი,
სქანჷ ბირბინწი მის ოხუჯუ?!.
ტყაშ მაფა დო ოჩოკოჩი
წყარს ეკოხე ტყაშმაფა დო
მუშ მანწარა აფუ რინა,
მიგვარგვალუ ინგირწყარი,
ჯა დო გვალაშ მითნარგინა.
ინგირპიჯის მიკინგარსჷნ
ტყაშმაფა რე ჩელაია,
მოტყობუნს ოჩოკოჩი,
ფრიმულოჩერჩელაია.
ირული, ვეგიახაბარკა დო
ვეგიანთხა ნახაფულს,
სი სარალო, ეთიმწკუმა
ძირუნქ ჩხე-ჩხე ჩილამურს!..
მიფიორუ ტყაშმაფა დო
სო იტყობუნ, მის უჩქ თინა,
ოჩოკოჩის ვეგიაჭიშუ,
მუშ მანწარა აფუ რინა!..
თე ჸოროფა მუ ჸოფე დო
მუნერი ჸოფე, ოკო რჩქინა…
მიგვარგვალუ ინგირწყარი,
ჯა დო გვალაშ მითნარგინა…
ზოთონჯი
ნოჸელი ნოჸელს თეშ გეთხოზ,
მირულედან მორულეფი,
ბორიაქ გეშეხანგალუ დო
გილეჩუუ ბორულეფი.
ქინთიტყობუ ნოჸელეფს,
მინ კიჩუნს დო მინ ფაჩუნს,
მოურს თირი, მოფუცქინუნს,
მოცენსჷ დო მოფაშქუნს.
მოურს ბამბეშ ნოსეფცალო,
მოურს ფარფალიაშორო,
ე ჸინიშა მუს გარზინე,
ეშ მასქვამა ვარდას, მორო?..
აბა ნამუს გითაღინე
ე ზოთონჯი თოლისერი!..
ღორონთი, სქვამას გომთანე დო
ღორონთი, სქვამას დომისერი!..
…
ქვარა რძღაფას ვემიაშქვა,
დიო სო რე თანაფა,
ე პიჩვანს ლებიაშა
ღუმუში ელაწაწაფას
შურო მუ უჯგუ,
ნტკორუნქ თიშენი,
სქან ომბარალ დომბარე,
ნამთინ კობუ ირჩინუ დო
ნამთინ ჯგირო ტომბა რე.
ჭუმანერი დღაში მოძირაფა
ოროიას ალახე
ჩე დედიბი ხვალახე.
ოგვაჯეს კარკალით
სუმ დუდვალუ მარქვალი.
სუმშა გაგმუკვანწუ ონწე,
ურდუ სქუა, მუში მონძე.
სუმი ურდუ ერცქემი,
ღორონთ, მარდი ქვერსემი!
სუმი ურდუ ყილო,
ვეჩითვალე კილო.
სუმიხოლო ქომოლი
ომბოლობაშ ორზოლით.
სუმი ჸა რე ფალირი,
სუმი შარა – ხარილი,
ხანდა ვარე დინაფილი,
თაში ჸოფე ჭარილი.
სკუალეფიშ ჯგირობუათ
ხომ მუთუნს ვადალახე,
ოროიას ალახე
ჩე დედიბი ხვალახე.
მუდა სერ დო მუდა თუთა…
სუმი ბჟა დო სუმი თუთა…
სუმ ხორუა, სუმ მენდი,
მუქ იჸუას ეშ მეტი.
მიტკვარჩალუნა მოთალეფი,
შურ დო გურიშ ორთალეფი…
……………………
ოროიას ალახე
ჩე დედიბი ხვალახე…
შკვითი ტანკა
. . .
სასაფლაშჷ დიხა
ქინოკინე, გონჯამე.
–ეკვოფშათ მალას,
ვაოძირათ დიაჩქინს,–
დიფუცხორეს სქუალეფქ.
. . .
წკურუმია სერს
ეიპოპორჷ ბორიაქ,
იჟუმინუ თეში,
მერეთის იჩიებუ,
ტყურა–ტყურას ბარდღალანს.
. . .
თიშნერო თანდუ,
ჟიშე მურს ძალეფი,–
შულადა მეურს,–
თოლიშსინთეთ იფშაფუქ,
მოინარტუანს ხანდებას.
. . .
იახა, თაშ რე,
მეღირჭკინუნს ქიანა,
ჩქი ხოლო მეპუნთ,
თის მუ ოღირწკინუანს,
ცოდათ ვარდას დოზურზილი?!.
. . .
რულაიათჷ
ბაღანობა გენკომჸონი,
ცირობუა გენკომჸონი,
აჭ დო გაჭით მირულექ,
ბორჯი, სო მინჭუაფუქ?..
. . .
წყარს ჟი მა ვორექ,
წყარს თუდო – ჩქიმი ლანდი,
დუდს ლანდო ორწყექ,
დუდს ლანდო იჩინენქ დო
შხვას რენო ვაჩირთუქჷ?
ძიცაშ ძალა
ბჟა ვალუნსჷ ძიცას,
ბჟას წყურგილეფ მაბარჩხალჷ,
ინივარკალჷ ცა,
ბჟა, წყურგილ დო ცა ართო –
ძიცაშჷ ძალა მერჩამდას!..
ოთხი ჰაიკუ
. . .
კოჩჷ თისხი რექ,
მუშ ორან გიღჷ მუკმუკი,
მუსუთ იგინანქჷ.
. . .
ოროიაშფერჷ
შურეფი გილევალუნა
წკურუმია სერს.
. . .
ნოქური გოსქიდჷ,
ჯვეშიშჯვეშიქ მოიჩინჷ
გილართე სქვამას.
. . .
გურს მიდგა რჸუნს,
თოლეფშათ ინოიხე
მუდგა ქიმინე.
