ოხვამერი
მარდობა, ქრისტე,
მუჟამც მებდინი,
აშო მორთი დო
პატი გებდვინი.
შურც ვაკო ჸუნდას
დიხას მოჯგირე,
მა ღურუს ღურათ
ოკო ვორჯგინე.
,,ნახარებ" მუჩი -
გურიშ ოგინე,
თიშ უმშო შური
ვამატყობინე.
ხანდაქ დო შიბაქ
თოლონჭ გონირსჷ,
,,მოკო" დო ,,მოკო"
ირ დღას მონირზჷ.
ბორიაშ პოფექ
მა თაქ მაყარე,
მარდიშ საგამათ
ცოდა ბშაყარე.
კათა დუდიშულ
რინათ მიაშქვი,
მონტუ ჸავავა
ერემიაში.
სო იშაყარუ
წანეფ ჸოფილი,
სო მეურც შარა
აკოსოფილი?
ვარა, სო ტყობუ
ღორონთიშ ნარდი,
ჯიმალობა დო
ჸოროფა მარდი?
მითა მაგორე
მუთუნ უჩქუნი,
კისერც გებძჷნა
ევაშ უშქური.
მოგურეს ხვალე
რკება დო ძინა
მეტ მუთა ჸოფე
ოფუტეს რჩქინა.
ღორონთ, თე ღულა
შარა გომთინი,
შურც ოკო ულა,
სქანდა დორთინი.
მარდობა, ქრისტე,
მუჟამც მებდინი,
ქუგომშინი დო
პატი გებდვინი.
შურობუმუ
შურობუმუში მინდორეფც
შურიშჲ შარეფი გაფჷ ნალჲ,
მიქ მერკვათჷ ფსუალეფი
მურიცხეფშა მაფურნალჲ.
სქან ოცქვაფურ ისტორიას
ხეჭკურელო მუკურექ,
გოღანერი კოლხიში სქუა
ამდღა ჭიჭე ძუკუ რექ.
ქოგურაფუქ აგაგას,
უჩხონჩხე დო უგურეს;
თელეფწკჷმა რგორი, მარა
ლეგენდეფშა მოწურეს.
სქან დინაფას თე ქიანას
შურო მითინ ვანარღენც,
ბორო რექ დო ეშმაკის
გიძახჷნა გამაღეთ.
დოღურიდა, მუ გიწუა,
მეტის ვადოიბანძღუანქ,
გოცქვენი გვალო ქჷდგარულ,
ეგებ მოირთას ლანძღუაქ.
მეტყურეფიში ქიანას
მეტყურეფიშჲ ქიანას,
ბულც წილჷნა იანარც,
შურო ბირგულჲ ქჷგორგჷნდა
ულაქ ვადგეგვიანას!
ბულიშჲ ამბე, ამჭუანჲ,
გასიმესჷ ციორით,
ასე ირ კოჩჲ, კარაჩხამო,
გილერულე ხიოლით.
ჟი ზოჯესჷ: - ტყურეფიშა
მართალჲ ვამიწყორუათ,
კათაქ ოკო დოშურდას
ვარენჲ თიში გორუათ!
ღორებულეფჲ ონჯუაშა
ტყა დო გვალას ილენდეს..
ჭუმე ხოლო ვემიარკენა
ათეჯგუა იმენდეფც!
ინგირი
სო მეულ, ჩქიმჷ ინგირი,
სო რე მიხურთქინჷქჷნი,
მუთ გიჩინა, ეთეურე,
ზღვას ქიმშადინჷქჷნი.
რზენიში სანძღოს ითებუქ
მაღალჲ გვალაში დჷნაბად,
ზღვა, ჩხანა დო ქარ-ბორია
გინგოჩქვანც მუნაფათ.
აშო ჭვემათ დუმართუქ,
აშო ნირსო დუმართუქ,
აშო თირო დუმართუქ...
მუკი-მუკი გუმართუქ.
აკა წუნც ვესვანჯჷქ,
გიღუ ღორონთიში ნძალა,
მიბურჯანქ დო ზღვაშა მეიღ
თირჲ გვალაშე გჷმნაჭვალა.
ენოჸუნქ სქან რობუს,
მუთა გიჩქ გინორთიში,
დღასჷ ვაგაბანძღუ შარა
გეწურაფილჲ ღორონთიში.
მა შარას ქიგლაფსქიდი,
ირფელ ართო აკვათე,
ეშმაკიშჲ გოზაკვილქ
ვამიჩქ ნამ ზღვას ვაკათე.
შხური
მედეა დო აიეტიში
ოხვამერი შხური,
მუთუნც ვამრაგადჷნქჷნი,
მუშენი დემენდური.
ღორონთშა მაფ ზალებური
სქანი წკონდა შური.
სქანი ტყებიშა გეჭარილი
რჩქინა ჯვეშ კოლხური
მიღუდუ დო მივოდინენი,
მა ეთი დღას ბღური,
რინტუეფშე გორთირე დო
თოლეფი ქიგიბწკური.
დონ კიხოტიში აგაგა
ჩელაში უღუ გილამიღუ
ჭურია დო ნაბადას,
დიბშირი დო ქუვაგური
დომ კიხოტიში აგაგას.
თუდო რზენიში ფართანას
მობწყინდი დო აკა დღას
იმენდეფიში იმენდით
გეკვაკითხე ლაკადას.
გილურქუ დო ხვათახვალე
გილვობარდა ლებარდეს,
მა დო ჩქიმი ჭკოლა ცხენც
ონჯუაშა ვემმართეს.
თავრე ხოლო მითინ ვარე
ფულირ ბორჯიშ გინაფას
დო ვოცადუქ კირიბიში
შურიშ გოკურცხინაფას.
ითამ ქიდიბურძღინუო,
მასქური ქექას ირქენცჷნი,
ვამიჩქ, თუთა დო მურიცხი
მუშენი გიმაძიცენცჷნი.
ჟი, გვალაშე მუკნახარცქა,
შხუმინ ორე წყარეფიში
დო ვარ ნგარა ელმასჷმე
ულირ ანთას წანეფიში.
უჩა დღაში ჩილამური
შურშა ნარღო ენომწენც
დო უშარე შარეფით
გილუნთირუქ ჭკოლა ცხენც.
,,დულსინეა" სო მაგორე,
ჩე დო უჩათ გოთილ შურც,
,,სანჩოქ" ხოლო ჩქიმი საჸალე
შორშე ქიმიობორდიშუ...
დაჸვერებე მარგალონა,
დაჸუნგებე მარგალური,
მა თე ცა დო დიხაშქას
ჟირშა დებაბდი დო ბღური.
მენდი შურშა ენომიხე,
მუჭოთ თოლი მარწკინდიში,
გონირზჷქდა, რჩქინა მოკო
დომფული დო ვამწინ თიში.
ქარ-ბორია ვაიჩქუდა,
შარას გილემანგარუნი,
მა ვორექ დონ კიხოტი,
ჩქინობურა, მარგალური.
მეურქუ დო ირ დიხაშე
ეკმოძიცუ გვალა-რზენქ,
მუშ მოხოლეთ ვამიჩინ
ჩხოროწყუ დო ნარაზენქ...
დო სი ხოლო საწმოხონოთ
მუთუნ მენდის ვამარზენქ,
მუ გოწყინეთ თეშ მანწარა
მა დო ჩქიმი ჭკოლა ცხენქ.
დიო სქანი მოსაწონი
ვამკებუნა ხეს მუთუნი,
ღორონთი თოლეფც გომინჯანც,
ჩე გვალაშა გეშურქუნი.
თეიშა მუთუნ ვამიწუა -
საყალე დო უმარდული,
ვაფირქენდა, მარსხებელო
გუბაზ მაფა დუგართუნი.
ინა ხობის დუყვილჷნა,
ისტორია რაგადანც,
დო მა ასე ეკოპუნქ
დონ კიხოტიშ აგაგას.
აჸონება
პოპორც მუ არზენც ჭყანას,
წყარ ეშე ეთმოწენცჷნი,
გვალა ქარწყენო გვალას,
ჭვემას ქუჩქუნო ჭვენცჷნი?
ქარაგადენო მითინც,
მუ შარათ მოურც აფუნი,
ვარა მუ ოკო ნირსის,
მინდორფეც მიწიფაფუნი?
მი უგანც ორთას მარდის,
მაფალუს ცუნდის ჩანცჷნი,
ქაგინნო ეთი ვარდის
ჰამო შური გაფურკანცჷნი?
რჩქინა ქოძჷნო სოთინი,
მითინც ქუჩქუნო მუთუნი,
მი მიწინც, სოლე მოფრთინი
დო ვარა სო მეურქუნი?
პოპორც მუ არზენც ჭყანას,
წყარ ეშე ეთმოწენცჷნი,
გვალა ქარწყენო გვალას,
ჭვემას ქუჩქუნო ჭვენცჷნი?
მარგალური
სი დაჭყაფურ ნინა რექ,
დიო ფულირ რჩქინა რექ,
ორთაში დორთაში თოისერც
დუდშე გინნაჯინა რექ.
მაჟრა მულაში ნინა რექ,
მოკითხირიში ნინა რექ,
ქანას ჟიშე მინარექ,
ბჟა დო თუთაში ჯიმა რექ,
სი ლაზარეში ნინა რექ,
საღორონთო რჩქინა რექ.
მარუო
ჩხანას თუდო გიმულებ დო
დუც ინწყუანც უჩა ზღვას,
აკოსერელც კინ თუთაშა
დორთა ოკო თუთაშხას.
მარაში დღალეფც უგურუა
ბორჯიში ჭიჭე ნახარცქას,
მურიცხეფიში თარჩია რე,
თახა მოურც თახაშხას.
სერიში უჩა ნოღართია
გოუსოფუნა ღუმა შქას,
ჯუმას ოკო დოხვამლაფა
ათე მარაში ჯუმაშხას.
მუთ გიძირჷნ თინა ორე,
თაშჲ ჸოფე დო თაში რდას,
ამსერ დიმუნუანც, მარა
გიფთანუა ცაში დღას;
ღორონთიშ ხეთ ერზაფილჲ
სინთექ ოკო ვაშქირტას.
ობი უჩა მურიცხი რე,
ქჷმმაკათუ ობიშხას,
ჩქიმ გორუას მუთა ოკო
ზუგიდი დო ხობიშქას.
თოლეფჲ მა შხვას მოძირანც
დო მირაგად გური შხვას,
ულირეფიში გოშინა დო
შურიშჲ დღა რე შურიშხას.
დო მაშქვითა გოთანას,
საღორონთო ბჟაში დღას,
ევაში ცოდაში ნაშქვიდას
ეგებ რსხება მაშიდას.
მაბრუო დღა ხოლო ჸოფე,
მარა ჩქინდა მუთ მორთას,
იშჲ სინთეშა შარა მებჷ
ხვათახვალე გოლგოთას.
მა დუართი აიას
მი ვორდი დო სო პოფექ,
ასე ხოლო გურ მანგარც;
მა დუართი ჩქიმ ღობერც,
მა დუართი ჩქიმ ჯარგვალც.
კოც, დუდიში უბედურც
მუქ აღოლჷნ ქიმეჩიჲს;
მა დუართი ჩქიმ ყებურც,
მა დუართი ჩქიმ ნერჩის.
უფერუა იმენდის,
ანწი მუჭო მიდინას..
მა დუართი ჩქიმ ბედის,
მა დუართი ჩქიმ რინას.
ორქოში ოკვანწაიას
მიდგაქ ოკონი მაძღირკას;
მა დუართი აიას,
მა დუართი ლაზიკას.
