კახათი
ცირაშორო გელუხვიჩონდ ჩე გოთანას ღვაქ დო
ჟინცაშ შქაგურს ამანწკარილ ზიტყვეფ გეგმიბღ გიმე...
ჸუდეშ ხოლოს, ოდაფეშე, ბაღრე იბირს თაქ დო
მივარჩქილექ მა თიშ ჭურჭულს. ხონარ ვეკმაღინე...
ბჟა კარკაცანს. ოპეულეს ცუნდი მინმადინ დო
ელმებძიცა. მინვოჯღონა ირკოჩიშა ხვამას...
ოლაფარეს ალედიარს ჭარჭულია გინ დო
მირულენა წიწილეფი, ჸვინთელეფი, სქვამას...
ბების ხიოლ აწალაჸაფ, აწმაზადუ მოთას.
ღვალეფს გეჭარ კარაკანო მუზმა წანაშ ჭუა -
(მეჭეჭეფი თიქ მიდინუ, სუმშა თუთაშ მორთას).
გაჭყორდუნო, ახალობას გიწნალეფი სქუა...
მა ოფუტეშ ნარდ კოჩ ვორექ, თაქ დიბგურე ჭკუა.
(მუზმა ღორჯო ალამჭოფაფ წყარმალ უჩა ღალუს...)
ბაღანობას ჩქიმ ხიოლეფს თაქ აჩანუდ სუა.
თაქ ჸოროფაქ ენმათასუნ, ოდღამუშეთ ფალუნს...
* * *
ჩქიმ გინაფეფი მუნერ ფურე რე,
გურ ინმაგვაგუ, დუღა, ოგურეს.
ფშუ ქოთ დონთხაფა, ფშუ ქოთ ფურორი...
მა გიბჭყოლიდე მუდგა მოგურეს...
ირნერ ჩქიმ რჩქინა უმოღე ჸოფე
დო დუდშე იბჭყა ირ დღას თელარას...
მოკო კინ ცაშა ჟი გეშაფსოფე
ვარ-და, ამდღა დო ვარ-და, თე მარას...
ბორჯიქ დიღულოზ, ითამ სინა რე
დო ოფირჩასით * ვაუღუ სანძღო.
ირიათონიშ ბარჩხალ მინარე
ჩქიმ ჸოროფას დო დღას ვაკილანძღუ
მუდგა ჭუა დო ხიოლ ვეგნიღას...
ჩქიმ თოლოწონდე იფართანებუ.
მარდიშ ჭვემა რე. ნოტე ვეგნიღას!
გურს თაშ ოკო დო მათ თაშ მანებუ...
*
ოფირჩა - სივრცე
* * *
ბაღანობას ჯინა მიჸორდ მურიცხეფიშ,
კათაშ განშე, ოზეშ კუნთხუს კინოხუნა.
ათეშ გურშენ ხანგა პოფექ მა თოლს შხვეფიშ,
მუ უჩქუდეს, გურს ალმორედ შხვანერ ფუნა.
ფარონს გილვოგაგანდი დო მარწკინიეფს
ვოჸუნუანდ ბაღანობაშ წირდე თოლეფს,
ვუფერუანდ დორულაფირ ია-იეფს,
თუთაშ სინთეს იბლეცერანდ შურიშ ჭყოლეფს.
გამწიბრდი დო ჩქიმ ჯვეშ აკანს დუვართ კინე,
მარა სოთინ მარწკინიეფ ვეპალუნა!
ულირ ბორჯი, სქემე, მარა მუს დართინე,
ზოთონჯიშ გურს პეულეფ ხომ ვეფალუნა.
დეა ნ.-ს
ბუძგურია გუმოდირთუ, დეა –
სო განტირედჷ თეშ მატომბა შური?
სი მილუანდჲ, მუჭო ჩქიჩქუს, დია –
მუჟამც ბდინი, მუჭოთ ქირსეშ შხური.
მა ფშუ, თიმწკმა დახე ვარა ბღური…
მუშ მაშხვა რდუ სქან ჸოროფა ძღაბი,
მუჭო ირკენდჲ ჩქიმიშ გურშენ თიას,
მუჭო გიჸორდჲ, მუ ჩილამურ დაბი,
მუ ერზამილ, ფაჩუნდჲ წკურუნტიას!
მუჭო მირზუდჲ, თენერ შაურთიას?!.
ხე დო დუდის გომილუანდჲ, მა ფშუ
ციცინაფილს, ღურელს ჩხურუშ გეშა.
ხორცქუ გური, ნარღიქ წვანდშა გაფშუ,
გუმაშინე თი დღალეფ დო ფქეშა.
ულირ რე დო მუ მიხვარნე ეშა…
ჩქინ ხუტოლი დღას ვაჸოფე ღიჟე,
მოფურუანდჷ სქანი ჩხე-ჩხე ჩხეშა.
ვურჩქილედით "ენიას" დო ჟიშე
მიმარულედჷ სქან გურპიჯშა, ჩხეშა.
კურცხეს, მუსხანს აშამჯანუდჲ ხეშა…
მუჭო მონარტჷ სქან ჭუბურფერ თოლეფ,
გიჯუნუნდინ ეთი ჩელა ჸალი,
პუდელჯგურა სქან კიროკილ თომეფ,
კიდირიშ ჟი მინორხედჷ, თი ხალი.
მუზმა ქიმნგარჲ, მუზმა ქიგლაფთვალი…
გუმასოფუდჲ, გუმატიბუდჲ, მა ფშუ
ცანცალეჸოთამილს, ჩხურუშ გეშა.
ხორცქუ გური, ჯაბიქ წვანდშა მაფშუ,
აწმავალუ თი დღალეფ დო ფქეშა.
გურს მაჭუ დო მუს გარზინე თეშა…
